Ұлы Абайға арналған әдеби шығармашылық кеш

Ағымдағы жылдың 10 тамызында қазақтың ұлы ақыны, қазақ әдеби тілінің негізін қалаушы Абай Құнанбайұлына арналған «Ұлы Абайдың мәңгілік мұрасы» атты әдеби кеш өтті. Шараның басты мақсаты − Абай щығармашылығын насихаттау арқылы қазақтың тілі мен мәдениетіне деген білікті арттыру, сондай-ақ қала тұрғындарын кітап оқуға баулу болса керек. Осындай айтулы күнде мәдениет, тілдерді дамыту, дене тәрбиесі және спорт бөлімінің басшысы Баян Айтбаева барша жиылған жұртшылықты құттықтап, өзінің жылы лебіздерін білдірді. Аталған іс-шараға қатысқан оқушылар Абай әндерін орындап, поэзиясынан үзінділерді қазаақ, орыс және ағылшын тілдерінде жетік меңгергендерін көрермендерге паш етті. Сонымен бірге, Абайға арнау оқыған жастарымыз да назардан тыс қалған жоқ. Мәдени жиын барысында ақынның қара сөздері, поэмалары мен өлеңдер жинағынан құралған шағын көрме ұйымдастырылып, көпшіліктің назарына ұсынылды. Шығармашылық кеш әр түрлі сайыстардан құралып, қатысушылар арасында өзара тоғызқұмалақ, дойбы сынды ойындар да ойналды. Кеш соңында барлық қатысушыларға алғыс хаттар мен мадақтау грамоталары табысталды. Ұлы ақынға арналған мәдени шара қаламызда бірнеше күнге созылып, өнерпаздар мен көрермендердің есінде қалады деген сенімдеміз. «Қалың елім қазағым» деп жырлаған ұлы Абайдың шығармашылық мұрасы – халқымыздың ғасырлар бойы маңызын жоймайтын асыл қазынасы болып қаларына күмән жоқ. #mediastep #media #stepnogorsk #mediastepnogorsk #stepnogorsknews #aqmolanews #aqmola #aqmolaregion #kazakhstan #journalism #tv #news #степногорск #медиастепногорск #медиацентрстепногорск