Япалан хуçи пур

Кашни япалан хуçи пур. Енчен те унта е кунта пĕр-пĕр япала тупсан вăл сирĕн пулнине пĕлтермест. Ăна хуçине каялла пама тăрăшмалла. Мĕншĕн? Кунпа тĕплĕнрех «Гарант» компани паллаштарать. АНАСТАСИЯ ЕГОРОВА: «Граждан кодексĕнче «Тупнă япала» статья пур. Кун пирки нумайăшĕ пĕлмеççĕ те. Унпа килĕшӳллĕн япала тупсан çакăн пирки çухатакана е çухалнă япалан хуçине пĕлтермелле. Енчен те япала лавккара е транспортра тупсан, ăна сутуçăна, кондуктора е водителе памалла. Ытти тĕслĕх чухне вара полицие е вырăнти администрацине пĕлтермелле. Кунта çакна та палăртса хăвармалла, вăл е ку япала тупнă тесе пĕлтерсен çеç ăна çын хăйĕнче тытма пултарать». Пĕлтерӳ хыççăн ултă уйăхра хуçа тупăнмасан вара çын тупнă япалана хăйĕнче хăварма пултарать. Никама ним пĕлтермесĕр тупнă япалана хăйĕнче хăварсан çынна административлă тата уголовлă явап тыттарма пултараççĕ.