Марина Юсупова сси æппæтуæрæсеон æркасты призер

Мæскуыйаг центры федералон фæзы сценæйыл Дзæуджыхъæуы 7-æм скъолайы педагог-психолог. Марина Юсупова сси Æппæтуæрæсеон æркаст «Педагог -Психолог»-ы призер. Фæуæлахиз «Мастерство владения научным подходом в решении профессиональных задач», зæгъгæ, номинацийы. Проект бæстæйы алы регионтæй сæмбырд кодта 80 специалисты. - Тынг æхсызгон мын уыд ацы æркасты архайын, бирæ æхсызгон æнкъарæнтæ райстон, ног зонгæтæ мын фæзынд. Бузныг дæн Ахуырады министрадæй, ахæм фадат мын кæй фæци, уый тыххæй. Мæскуыйы равдыста «Я умею говорить: „НЕТ“», зæгъгæ, практикæ. Уый æххуыс кæны æнахъомтæн цыфæнды уавæрты дæр хи хъуыды раргом кæнынæн, ныфсхастдæр уæвынæн, уыимæ иннæтæн дæр аргъ кæнынæн. — Мæнæн æркаст сбæлвырд кодта психологи ахуырады уæлæмхасæн лæггад кæй нæу, фæлæ хъомыладон куысты хай. Марина Юсупова скъоладзауты ахуыр кæны сæхицæн аргъ кæныныл æмæ ныфсджын уæвыныл. Тренингы хуызы 5-æй 11-æм къласы скъоладзаутæ кæрæдзиимæ архайынц, къорды кусынц. Ахсджиаг здæхтытæй иу - æнгом коллектив. Уыимæ ма æнахъомтæн æмбарын кæны, адæмимæ ахастдзинæдтæ куыд аразгæ сты, уый. — Тынг цымыдисаг ахуыртæ нæм вæййы. Нæ педагог нын æххуыс кæны царды цыфæнды зын уавæрты дæр ныфсджын уæвын æмæ дзы уый тыххæй бузныг стæм. Маринæйы фæлтæрддзинад бæлвырд кæнынц йе 'мкусджытæ дæр. Уæлдай аргъы аккаг та у йæ куыстыл æнувыддзинады тыххæй. - Психолог уæвын уый æрмæст зонындзинæдтæ не 'сты. Психологмæ, æнæмæнг, хъуамæ уа хорз интуици. Æмæ йæм уый ис. Зоны адæймагмæ байхъусын, арф хъуыды кæнын, архайын , æмæ æрмæст сывæллæттимæ нæ, фæлæ сæ ныййарджытимæ дæр. Уый у æнтыстдзинадмæ фæндаг. Марина Юсуповайæн конкурсон куыст иу хатт ма сбæлвырд кодта, скъоладзаутæ психологон ахуырты цы зонындзинæдтæ райсынц, уыдон сын пайда кæй сты, уый. Ацы фæлтæрддзинад та сæ, æнæмæнг, бахъæудзæн æрвылбоны царды.