«Кодекс куманикус» кітабы қайда? Қыпшақ тілі - халықаралық қатынас тілі

2017 жылы Венецияда өткен «Бабалар ізімен» ғылыми экспедициясы барысында біз XIII ғасырдың құнды жәдігері «Кодекс куманикус» кітабын қолмен ұстап көруге мүмкіндік алдық. Көне қыпшақ тілінің бұл белгілі жазба дереккөзі қазір Марчиана Ұлттық кітапханасында сақтаулы. Кітапта діни мәтіндер, жұмбақтар, сөздік, сондай-ақ әнұранның ноталары бар. Осыған қарап, 800 жыл бұрын Алтайдан Дунайға дейінгі аймақта өмір сүрген адамдардың барлығы қыпшақ тілінде сөйлеген деген пікірді алға тартуға болады. Азия елдеріне саяхат жасайтын Батыс Еуропадан келген саяхатшылар қыпшақ тілін үйренді, яғни бұл халықаралық қатынас тілі ретінде қолданылды. Қыпшақ тілін білмей, Еуразия кеңістігінде қарым-қатынас жасау мүмкін болмады.