Серыя паштовак Ганны Шэўчык «Вобразы любай краіны»

Ганна Шэўчык распрацавала серыю паштовак «Вобразы любай краіны», якая прысвечана беларускім гарадам з прымаўкамі і крылатымі выразамі ды адметнасцямі гэтых мясцінаў. Гэтая праца адна з пераможцаў творчага конкурсу «Сымбаль натхнення — Беларусь!»: http://artsiadziba.by/news/2017/07/01/symbal-pieramozcy/ Паштоўкі зараз дарабляюцца і афармляюцца ў адзін стыль. На іх будуць размешчаны архітэктурныя помнікі, якія з'яўляюцца своеасаблівымі сімваламі гарадоў, у якіх яны знаходзяцца. Спачатку выйдзе сувенірны камплект паштовак, а бліжэй да новага году — каляндар на 2018 год «Вобразы любай краіны» з 12-цю гарадамі і арыгінальнымі малюнкамі Ганны Шэўчык. Кожны сюжэт паштовак дадаткова будзе зроблены ў выглядзе анімаванай паштоўкі. Паштоўкі характарызуюцца ўласнымі шрыфтамі і графікай. На погляд аўтаркі, такія рэчы здольныя падняць узровень нацыянальнай самасвядомасці, а таксама зацікавіць замежных гасцей гарадамі нашай краіны. Плюс гэта выдатны шанец вывучыць прымаўкі і крылатыя выразы па-беларуску!