Працоўны ДСУ – 10 у Калінкавічах: Пойдзем на плошчу, пасядзем з каскамі, няхай нам падаюць (+відэа)

Кіраўніцтва ДСТ-2 (дарожна – будаўнічы трэст) мае намер скараціць (аптымізаваць) два свае філіялы ў Калінкавічах і Жыткавічах. Пры гэтым чыноўнікі запэўніваюць, што рэарганізацыя не закране інтарэсы працоўных, будуць захаваны амаль усё працоўныя месцы і памер штомесячнага заробку. Працоўным ДСУ – 10 (дарожна – будаўнічае кіраванне) у Калінкавічах прапанавалі перавод у ДСУ – 17 у Гомлі, і ДСУ- 19 у Рэчыцы. Але працаўнікі ДСУ – 10 у Калінкавічах абяцанням кіраўніцтва да канца не вераць і маюць апасенні, што са сканчэннем тэрмінаў кантрактаў, з імі папросту не падоўжаць кантракт. Да таго ж перспектыва жыць у Калінкавічах, а працаваць у Гомлі ці Рэчыцы многім падаецца маларэальнай. Страта працы для ўсіх – шлях у беспрацоўныя, бо, згодна з меркаваннем працаўнікоў, уладкавацца на іншую працу ў Калінкавчах ў іх наўрад ці атрымаецца. Кіраўнік ДСТ – 2 Юрый Місюк патлумачыў неабходнасць аптымізацыі - скарачэннем фінансавання з бюджэту на будаўніцтва і рамонт дарог, адпаведна, малой загружанасцю працай, высокім сабекшотам работ з прычыны раздзьмутасці штатаў. З-за апошняга, на думку, чыноўніка, беларускія дарожнікі не могуць канкураваць з прадстаўнікамі іншых краін у міжнародных тэндэрах. Наогул, па трэсту плануецца скарачэнне 15 % ІТРаўцаў. Канчатковае рашэнне па пытанню аптымізацыі працы ДСУ – 10 яшчэ не прынята і працоўным застаецца спадзявацца, што кіраўніцтва пойдзе ім насустрач і знойдзе магчымасці захаваць філіялы. Аўтар: Ларыса Шчыракова Відэа аўтара