"Төрт-түлігіміз қыстан аман шықпайды". Маңғыстаулық шаруалар дабыл қағуда

Маңғыстау облысындағы шаруалар қысқа дайын емес. Олар қуаңшылық пен қымбатшылықтың кесірінен мал азығын толық қамдап үлгермегендерін айтып отыр. Сондықтан, көтерем болып әзер жүрген төрт-түлігіміз қыстан аман шықпайды деп дабыл қағуда. Ал биылғы аптап ыстықтан-ақ қыстың қаһарлы болатынын болжаушылар, суық ұзаққа созылады деп отыр. Жаздың өзінде көтерем болып қалған төрт түлік енді қайтпек? Ала жаздай қуаңшылықтың зардабын тартқан Маңғыстау облысындағы жағдай әлі оңалған жоқ. Қымбатшылықтың кесірінен мал азығын толық қамдамаған шаруалар, қыстан төрт түліктің аман шығуына күмәнмен қарайды. Сондықтан, малмен күн көріп отырғандар өңірде шұғыл төтенше жағдай жариялау қажет дейді. Айтуларынша, егер қыс ұзаққа созылса, қазірден көтерем болған төрт түліктің бәрі қырылып, өрістер қайтадан өлексеге толады. ЖӘНІБЕК ҚОЖЫҚ, қоғам белсендісі: – Біз мал азығын дайындап қойдық, бәрі бар, 80 процент, 90 процент деу бекер әңгіме. Төтенше жағдай жариялануы керек. Бірақ, бізде қазір жарияламайды. Жариялайды, ертең халықтың малы жаппай қырылып қалғанда жариялайды. Бірақ ол кезде тым кеш болады. Бір қатып қалған заңдары бар. Мынандай мал өлу керек, бүйту керек, сөйту керек деген. Ал, этнограф Болат Бопайұлының айтуынша, жаз қаншалықты ыстық болса, қыс соншалықты суық болады. Оның болжамынша, қытымыр аяз әсіресе ақпанда қаһарына мінеді. Сондықтан, әсіресе қуаңшылық болған өңірлерде қыс ұзаққа созылады дейді ол. Демек, шаруаларға мал азығын биылғыдан да артығымен жасақтап, төрт түлікті суықта қорада баққан жөн. БОЛАТ БОПАЙҰЛЫ, этнограф: – Дегенмен биыл әлі күнге дейін күн жылы болып тұр Оңтүстікте + Соған қарағанда мамыр айларында, көктем айларында тіпті маусымға дейін суық сақталуы мүмкін. Өйткені ол кезде зауза деген амалдар бар. Бұрынғы кезде зауза кезінде жуанның жіңішкеріп, жіңішкенің үзілуі кезінде малдың қырылып қалатын кезі болады. Сондықтан, биыл дегенмен сақтанып, көктемге жем-шөпті іркіп, үнемдеу керек. Ал Маңғыстау облыстық ауыл шаруашылығы басқармасының мәліметі бойынша, дәл қазіргі уақытта қысқы қорда 70 мыңға жуық тонна шөп, 40 мың тоннадан астам жем жиналған. Базаларда жиналған қор шаруаларға сатылады. Осылайша мал азығына үкіметтен бөлінген 2,1 миллиард теңге қаражат қайта айналымға түседі дейді. . . . . Бізді әлеуметтік желіде оқыңыздар: Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1 WhatsApp Информбюро +7 777 331 31 31 #информбюро #басты_жаңалықтар #Ақиқатын_Айтайық