Дигорайы культурон рæзты центры кусы 18 сфæлдыстадон къорды

Ныртæккæ каникулты рæстæг у, фæлæ чызджытæ иунæг репетици дæр нæ цух кæнынц. Хонгæйы аив мелоди цæгъдынмæ хорз арæхсынц. Ахуыргæнæг сæм йæ хъус лæмбынæг дары. Рæдыд куы æрцæуы, уæд сын Елбайты Иринæ бацамоны, раст куыд у, уый. Æрæджы та райдыдтой чындзхасты æмæ тымбыл кафтыл архайын. Национ фæндырæй дæсныйадæвдисæг ахуыртæ ам парахат сты. Архайы дзы 20 сывæллоны, уыимæ ма Дыгуры районы хъæутæй дæр. Здæхт ныридæгæн кусы дыууæ азы — Дигорайы культурон рæзыт центр куы байгом, уæдæй. Фæндырдзæгъджытимæ иумæ кусы хихъæппæрисадон ансамбль "Ир" дæр. Къорд раззагдæр свæййы алыхуызон мадзæлтты æмæ æркастыты, зæгъæм, "Играй гармонь", "Душа народа", "Иры фарн"-ы. Æнтыстджын та уымæн сты, æмæ разæнгардæй ахуыр кæнынц алыхуызон инструменттыл цæгъдыныл. Районы культурæйы хæдзары кусы адæмон инструментты оркестр дæр. Репетуары фылдæр ирон мелодитæ. Коллективы рагæй банымадтой курдиатджын æмæ æнтысджыныл. Фарон фестиваль "Ирон фæндыр"-ы та райста "адæмон"-ы ном. "Æппынæдзух архайæм алы къæпхæнты фестивальты æмæ конкурсты. Республикæйы нæ хорз зонынц." Æдæппæтæй культурон рæзты центры кусы 18 къорды. Архайы дзы 600 сывæллонæй фылдæр. Ансамбль "Кафт", вокалон коллектив "Арфæ", хор, адæмон театр æмæ æндæртæ. Сæйраг нысан - сабиты курдиат раргом кæнын æмæ сæ алывæрсыг райрæзтыл архайын. "Нæ ахуырты фæрцы мах сывæллæтты хъахъхъæнæм æвзæр хъуыддæгтæй. Махæй цы аразгæ аразгæ у, ууыл разæнгардæй архайæм. Нæ размæ цы нысантæ ис, уыдон æххæст кæнæм." Ацы бæстыхайы ма ис районы библиотекæ дæр. Йæ хыгъды 40 мин чиныджы. Национ проект "Бинонтæ" æмæ дæлпрограммæ "Модернизация библиотек"-ы фæрцы райстой 170 ног фæрæзæй фылдæр, уыдон фæзындзысты филиалты дæр.